كتبت / مني خليل
ابراهيم عيسي انت مجرد مذيع حافظ كلمتين او قريت ونتشت كلمتين من هنا علي هناك معروف انك بتتكلم في كل حاجة كورة وسياسة واخبار ومشاكل وحوادث وقضايا لكن انت قلت الدين لله والوطن للجميع . كلام حلو فعلا طيب تقدر تجاوب نفسك وتقولي مالك انت بالدين وبأي حق تفتي فيه وتقول .. هو لا كورة ولا سياسة ولا حكايات . ده دين يعني له الشيوخ بتوعه اللي انت بتقول اننا مش محتاجين شيوخ ؟؟ ازاي يا ابراهيم مش محتاجين شيوخ هي فوضي ولا ايه ؟؟ ولا انت عاوز الدنيا بزرميط وكله يزيط. لا والله احنا بنحتاج الشيوخ في حياتنا جدا . غيرك مش بيعرف يقرا ولا يكتب ولا يفتح كتاب . ممكن يسمع وربنا يهديه في ناس اهتدت كتير علي ايد الشيوخ وتابت زي الشيخ الشعراوي . بلاش اللعب في منطقة الدين . عشان دي بتاعة ربنا . وبرضه لها ناسها .. وكمان احب افكرك الرسول خط أحمر( عليه افضل الصلاة والسلام ) والصحابة اما تيجي معلش تتكلم عليهم اذكرهم بكل تبجيل واحترام .. لانهم اصحاب الرسول واتباعه .. وفي اعلي مكانة في الجنة. اه اتعرضوا لابتلاءات في حياتهم من قتل وغدر .. بس مش لدرجة انك تعايرهم بيها وتقول ( ماهو عمر ابن الخطاب اتقتل واي يعني ** عدله عمله ايه .. ما تنساش ان الدنيا دار بلاء وابتلاء وهما قدوة لنا في همنا وغمنا وظلمنا في الحياة. عشان نعرف ان اشرف الناس اصيبوا باعظم الابتلاءات فنصبر علي الظلم والخراب . هما كان لازم يحصل معاهم كده عشان نعرف ان الدنيا فانية والمكان الحقيقي والرفعة والمنزلة في الجنة بس . ابراهيم بلاش تركب التريند بالطريقة الرخيصة دي عشان مش حلو كلامك ..
