الخلافات والمشاكل الزوجيه موجوده في كل بيوتنا وبنعتبرها ظاهرة اجتماعيه لانها بتتكرر في كل بيوتنا
ولكن بيكون ليها اثر سلبي علي اولادنا بمختلف اعمارهم و لو حاولنا نتكلم عن بعض المشكلات اللي بتقابل ولادنا هي التاخر في المستوي الدراسي واحيانا عدم الثقه بالنفس وبالاشخاص المحيطين بيه وممكن نضيف الخوف من الصوت العالي وضعف الشخصيه والعنف في التعامل داخل وخارج الاسره ونضيف مشكله الانعزال الاجتماعي للطفل ونضيف كمان الميل للاصدقاء والانتماء لبعضهم حتي لو كان سلوكه مختلف عنه ونضيف مشكله العند وعدم سماع النصيحه والتوتر والملاحظة المستمرة للوالدين عند فتح حوار اًو مشكله معينه .
من الطبيعي وجود الخلافات وحلها بعقل وحكمه وبهدوء ومن الضروري اننا نلاحظ ان الطفل بيسمع
وبيفهم وبينتظر رد فعل الموقف او المشكله
احيانا الام بتشتكي من عدم تركيز الطفل وانخفاض مستواه الدراسي ككل وبتكون ناسيه او متفهمه انها سبب في اللي بيحصل
الطفل عند حدوث مشاكل متكرره للاب والام بيفكر دائما ايه ممكن يحصل لو المشاكل استمرت وبسرعه بيفكر في انفصال الطرفين وكمان بيكون فكره او صوره عن شكل حياته هو واخواته بعد الانفصال وبسرعه كمان بيفكر يختار يعيش مع مين فيهم بالرغم من حبه الام والاب وده سبب كافي لتشتيته وعدم تركيزه في دراسته ولو اتكلمنا علي مشكله العنف مع اخواته او زملاؤه في مدرسته او النادي الخاص بيه هنرجع لنفس السبب وهو المشاكل والصوت العالي والخناق واحيانا العنف في البيت بيكون الطفل حاسس او فاهم انه اسلوب حياه او دي طبيعه التعاملات ومن هنا بيبدا يكون عنيف علشان يحس بالقوة ويعرف ياخد حقه من غيره ولو اتكلمنا عن مشكله الخوف والتوتر بيكون ناتج عن كثرة المشاكل ودائما بيكون وقت المشكله متوتر ومش فاهم وبيفكر هو هيقدر يدخل بينكم ولا هيكون رد فعلكم عنيف معاه هو كمان ولو اتكلمنا عن مشكله الانعزال الاجتماعي للطفل راجع للخوف من التعاملات لان بيكون فاهم ان التعامل والتواصل مع الاشخاص اساسه المشاكل والعنف ومن هنا بيفضل انه يكون منعزل علشان يحافظ علي هدؤه واستقراره
وفي اخر كلامنا من الضروري نحافظ علي احترامنا لبعض وخاصه وقت حدوث المشاكل وكمان نحاول نتحكم في كلامنا وتصرفاتنا لاننا قدوة لاولادنا ومش من الطبيعي اننا نكون سبب في مشاكل نفسيه واجتماعيه تشوه شخصيتهم وحياتهم ومن الممكن تدميرهم كاشخاص
